ئافاتی دیموكراتی لە غیابی دەوڵەتدا

لوقمان بیارەیی

تۆ لە جیاتی من بیر بكەوە و منیش ئەچم بە لای نێرگەلە و نمایشی ئەدەبی و ڕۆمانسی خۆمەوە …

ئاسانە زۆر, ئەو چی دروستكرد تۆ تێكی بدە ئەو دژی كێ بوو تۆ پشتی بگرە تەنانەت گەر وتیشی كوردم تۆ بڵێ من عەرەبم توركم فارسم كورە نەخێر شیعەم داعشم! ئەمە ستایلێكی نوێی سیاسەتی ئۆپۆزسیۆن بوونە لە كوردستان, مادەم عەلی حەمە ساڵح و سۆران عومەرەكان ئەڵێن پارتی دكتاتۆرە گەندەڵە عەمیلی ئەملا و ئەو لایە ئیتر موڵخەسی كەلامە و پێویست ناكات ئێمە گومانمان هەبێ و بیری لێ بكەینەوە, دە با بڕوخێ پارتی! مادەم مەریوان وریا قانع و سوشیال خۆرەكانی ئەوروپا دەنگدەری ڕیفراندم بە كەر گەلی كوردایەتی ئەزانن ئیتر هیچ زەرور نیە لە سلێمان یا بەسرا بژیم هەڤاڵ ئەبو بەكر پارێزگارم بێت یا هادی عامری, ئاڵا چ(اللە اكبر)چ (خۆر)ەكەی پێوە بێت پارچە پەڕۆیەك زیاتر هیچی تر نیە! ئا بەم شێوەیە خۆ خۆشیشە ها, تۆ كە زەحمەت بكێشی لە جیاتی منیش بیر بكەیتەوە! ئیتر من بۆ چی مێشكی خۆم مەشغوڵ بكەم, ئەچم بە لای نێرگەلەكەم و دوو نمایشی ئەدەبی و ڕۆمانسی نایابەوە .

ئافاتی فەزای دیموكراتی لە ناو گەلێكی ژێر دەستە و نا دەوڵەتدا ئەمەی لێ ئەكەوێتەوە, زۆر جار بە هۆی پلانی سیاسی و موخابەراتی دوژمنەوە تاك توانای بیر كردنەوە و بڕیار دان لە دەست بدات, سومبولە نەتەوەیی و نیشتیمانیەكانی خۆی بێ بایەخ و ڕیسوا بكات, بە جۆرێك هەر دەركەوتنێكی فەوزەوی بێت, خۆ پیشاندانی, بایكۆت و مانگرتنی نوسین و ئاخافتنی هەر هەمووی بەر لەوەی داوا و مافی خۆی بێت داوای كەسانی ترن كە ڕوخاندنە, خەڵكی بەسرا و ناوچەكانی تری خواروی عێراق لەوپەڕی توڕەیی و بێ وەزعیدا ڕژانە سەر شەقام و سەر دامودەزگا و كار بە دەستانی ناوچەكانیان بەڵام زۆربەیان ئاڵای عێراقیان لە ملیان ئاڵاندبوو, دروشمەكانیان لە سەر ئاڵاكەیان نەخشاندبوو, بۆ ?! چونكە ئەوان بۆ سزادانی دەستەڵاتداران هاتبونە دەرەوە نەك بۆ ڕوخاندنی نیشتیمان! دەی لای ئێمەش لەگەڵ یەكەم هوتافی خۆ پیشانداندا ئاڵای كوردستان ئەخرێتە ژێر پێ و دروشمی بڕوخێ حكومەت و بەڵێ بۆ عەببادی ئەوترێنەوە و بەرز ئەكرێنەوە كە لە دیدی ئەوانەوە ئەكاتە ڕوخاندنی پارتی و بەدیلی وجودی پارتی! ئەها جگە لە دێزەیی هیچ حونەرێك لەمەدا نیە من لە بەر ئەوەی ئوتاقێك دیوارێك نەخێر كەسێكی ناو خانووەكەی خۆمم بە دڵ نیە بێم لە ئەساسەوە خانووەكە هەڵتەكێنم, ئەمە تەنها تێڕوانین و بیركردنەوەی كەسانی بێ ئاوەزە .

من فەهمی ئەوەم هەیە مرۆڤ بە گشتی و ڕۆژهەڵاتی بەتایبەتی و خۆشمان تایبەتی تر, بە هۆی ئەمدیوو ئەودیو كردنمان و هەڵبەز و دابەزی بەردەوامەوە جۆرێك لە ڕق و ناجێگیری دەرونی وایكردووە جیاواز لە مرۆڤی هەر كیشوەرێكی تر دەربكەوین و هەڵس و كەوت بكەین, بۆیە گەر هۆشیاریەك یاسایەك گەورەیەك نەبێت جڵەو گیریمان بكات كائینێكی زەڕین نەك بۆ نیشتیمانی خۆمان تەنانەت بۆ گیانی خودی خۆشمان, بەڵام كۆمەڵگەی پێشكەوتوو بە گشتی و تاكی واعی بە تایبەت بەر لە سزا دان و ڕوخاندنی بەرامبەرەكەی, سزای خۆی ئەدا یانی تا بە خۆیدا نەچێتەوە ئۆباڵی گەمژاتیەكانی خۆی ناخاتە ئەستۆی كەس پاشان دێتە سەر دەوروبەری, باشەكان تەكریم ئەكا و خراپەكان سزا ئەدا عەقڵی كۆن وەلا ئەنێ و هی تازە ئەخاتە جێی, بەم شێوەیە لە ڕێگەی عەقڵ و لوجیكەوە سیاسیەكان ناچاری داواكانی ئەكات نەك سیاسیەكان ئەو بكەنە سەر نشینێكی موقیمی ئەسپ و عارەبانەكەی خۆیان .

ھەواڵی زیاتر