ئێستا زانیاری نوێ له‌سه‌ر هێرشه‌كه‌ی ئیسرائیل بۆ سه‌ر ئێران گه‌یشت
بەرپرسانی ئەمەریکا پشتڕاستیان کردووەتەوە کە بەرەبەیانی ئەمڕۆ ئیسرائیل هێرشی ئاسمانیی لەناو خاکی ئێراندا ئەنجام داوە.
بە گوێرەی ئەو هەواڵەی کە میدیاکانی ئێران و میدیا جیهانییەکان بڵاویان کردووەتەوە، بەرەبەیانی ئەمڕۆ دەنگی چەندین تەقینەوەی بەهێز لە شارەکانی ئیسفەهان و تەبرێزدا بیستراوە.
باسیان لەوەش کردووە کە ئیسرائیل هێرشی کردووەتە سەر بنکەیەکی سەربازیی سوپای پاسداران و چەند شوێنکی نزیک لە ژێرخانی ئەتۆمیی ئێران.
هاوکات حکوومەتی ئێران هەوڵ دەدات قەبارەی هێرشەکە کەم بکاتەوە.
بەرپرسێکی ئێرانی ئاماژەی بەوە کردووە: هیچ پلانێکیان بۆ دەستبەجێ تۆڵەسەندنەوە نیە، چونکە تا ئێستا ڕوون نیە ئیسرائیل ئەو هێرشەی ئەنجام دابێت!
ڕاپۆرتە سەرەتاییەکان باس لەوە دەکەن کە لانیکەم سێ تەقینەوە لە شاری ئیسفەهانی ئێران ڕوویان داوە، کە ژێرخانی دامەزراوەکانی بەرنامەی ئەتۆمیی ئەو وڵاتە و کارگەی چەک و بنکەیەکی ئاسمانیی گەورەی تێدایە.
گەشتیارانی فڕۆکەخانەی شارەکە و شوێنەکانی دیکەش باسیان لەوە کردووە کە گوێیان لە دەنگی بەرزی چەند تەقینەوەیەک بووە.
هەرچەندە بەرپرسانی ئێران باسی زۆر دژبەیەکیان پێشکەش کرد کە بەڕواڵەت بۆ کەمکردنەوەی ڕووداوەکان لە بەیانیی هەینیدا داڕێژراون، بەڵام بەرپرسانی ئەمەریکا خێرا کورتەیەکیان دەبارەی ئەو هێرشە خستە روو کە ئیسرائیل لەپشت هێرشەکەوەیە.
بەرپرسێکی ئێرانی بە ڕۆژنامەی (نیویۆرک تایمز)ی ڕاگەیاندووە کە پێیانوایە هێرشەکە بە فڕۆکەی بێفڕۆکەوانی بچووک ئەنجام دراوە کە ئەگەری هەیە لە ناوخۆی ئێراندا هەڵدرابێت.
لە کاتێکدا بەرپرسانی ئیسرائیل ئامادە نەبوون بە ئاشکرا هیچ لێدوانێک بدەن، بەڵام چەند بەرپرسێکی ئیسرائیلی ئاماژەیان بەوە کردووە کە ئیسرائیل لە پشت هێرشەکەوەیە.
بەپێی زانیارییەکان، پلانی ئەو هێرشە سیمبولییە و زیاتر پەیامێکە کە ئیسرائیل دەتوانێت لە قووڵایی خاکی ئێراندا هێرش بکاتە سەر وڵاتەکە.
کاربەدەستانی واشنتۆن ڕایانگەیاندووە کە هێزەکانی ئیسرائیل ئۆپەراسیۆنی سەربازیی دیکە دژی ئێران ئەنجام دەدەن، بەڵام سیما و قەبارەی ئەو ئۆپەراسیۆنانەیان ئاشکرا نەکردووە.
میدیاکانی دەوڵەتی ئێران ڕایانگەیاندووە، فڕۆکەی بێفڕۆکەوان لە سەرانسەری پارێزگای ئیسفەهان لە چرکەکانی سەرەتاوە خراوەتە خوارەوە، هەروەها وێنەی ڕاستەوخۆی هاتوچۆی بەیانیان لە شاری ئیسفەهان لە دوای خۆرهەڵاتن پیشان دەدەن بۆ ئەوەی دەربخەن دۆخەکە ئارامە.
هێرشە ڕواڵەتییەکە کەمتر لە هەفتەیەک دوای ئەوەی ئێران زیاتر لە ٣٠٠ مووشەک و فڕۆکەی بێفڕۆکەوانی ئاراستەی ئیسرائیل کرد لە کاردانەوەی هێرشی ئیسرائیل بۆ سەر کونسوڵخانەی ئێران لە سووریا کە لە ١ی نیساندا حەوت بەرپرسی باڵای سەربازیی ئێرانی کوژران.
لە دوای ئەو هێرشانەی ئێرانەوە کە تا ڕادەیەکی زۆر سەرکەوتوو نەبوون، ئیسرائیل لەنێوان فشارە توندەکانی ئەمریکا و لایەنگرانی دیکەی ڕۆژئاوادا وەڵامی خۆی دەسەنگێنێت بۆ ئەوەی لە هەڵکشانی زیاتری مەترسیدار لە خۆی دوور بخاتەوە.
کەناڵی هەواڵی N12ی ئیسرائیل ئاشکرای کردووە، کە بەرەبەیانی ئەمڕۆ ئیسرائیل ئامانجەکانی لە عێراق و سووریاشدا پێکاوە و هێرشی کردووەتە سەر بریکارەکانی ئێران.
میدیاکانی دەوڵەتی ئێران سەرلەبەیانیی ڕۆژی هەینی هەوڵیان دا ئێرانییەکان دڵنیا بکەنەوە کە وڵاتەکە ڕووبەڕووی هەڕەشەیەکی گەورە نەبووەتەوە.
سوپای پاسداران ڕایگەیاند: کە هێرشە ئاسمانییەکان فڕۆکەی بچووکی بێفڕۆکەوانیان تێدابووە. پەیامنێرێکی ئاژانسی هەواڵی (تەسنیم) کە لە نزیکەوە پەیوەندی بە سوپای پاسدارانەوە هەیە، لە بەیانیدا گرتەیەکی ڤیدیۆیی پەخش کرد کە کاتەکەی لەسەر کاتژمێرەکەی پیشان دا و ڕایگەیاند، لە دەرەوەی پێگەیەکی ئەتۆمییە لە پارێزگای ئیسفەهان کە “بەتەواوی سەلامەتە”.
سیاڤۆش میهندۆست، فەرماندەیەکی باڵای سوپای ئێران، بە کەناڵی تەلەڤزیۆنیی دەوڵەتی ڕاگەیاند: کە هیچ زیانێک لە ئیسفەهان نەبووە.
هاوکات دوای ڕووداوەکە، هەریەک لە فەرەنسا و ئیتاڵیا و عومان بە خێرایی داوای کەمکردنەوەی پەرەسەندنی گرژییەکانیان کرد.
