ئێران هەشت بەندکراوی کوردی لەسێدارە دا

حوکمی سێدارەی هەشت هاووڵاتیی کوردی خەڵکی کرماشان کە بە تۆمەتی هێرش بۆ سەر بینای پارلەمانی ئێران دەستبەسەر کرابوون، جێبەجێ کرا.

 

بەپێی ڕاپۆرتی گەیشتوو بە ڕێکخراوی مافی مرۆڤی (هەنگاو) بەرەبەیانی ئەمڕۆ شەممە 2018/7/7 حوکمی سێدارەی هەشت هاووڵاتیی کورد لە تاران لەلایەن دەزگای دادوەریی ئێرانەوە جێبەجێ کراوە.

 

لە سێدارەدانی ئەو هەشت کەسە لە کاتێک دایە کە دوێنێ هەینی مووسا غەزەنفەرئابادی، سەرۆکی دادگای شۆڕشی تاران بە ماڵپەڕی حکوومەتیی (تەسنیم)ی ڕاگەیاندبوو: “حوکمی سێدارەی ٨ تیرۆریستی داعشی کە لە هێرش بۆ سەر بینای پەرلەمان و گۆڕی خومەینی ڕۆڵیان هەبووە، بە مەبەستی جێبەجێکردن ڕەوانەی دادستانی کراوە”.

 

ئەو هەشت کەسە کە سەرجەمیان خەڵکی پارێزگای کرماشان، بریتییە لە: “تۆمەتباری یەکەم: سڵێمان موزەفەری، تەمەن ٥٥ ساڵ، کوڕی ڕەحمان و خەڵکی ڕوانسەر.

 

تۆمەت: بەغی + قاچاخ و هەڵگرتن و گواستنەوەی چەک و هاتنە ناوەوەی نایاسایی بۆ نێو خاکی ئێران، هەڵگرتن و ڕاگرتنی بەڵگەی ساختە و هەڵگرتن و گواستنەوەی گازی فرمێسک ڕێژ.

 

تۆمەتباری دووەم: ئیسماعیل سۆفی، تەمەن ٣٣ ساڵ، کوڕی مەجید و خەڵکی سەرپێڵی زەهاو، تۆمەت: هاوکاری لە خراپەکاری و ئاژاوەنانەوە (مفسد فی الارض)، گواستنەوە و هەڵگرتنی چەک و چۆڵ و تەقەمەنی .

 

تۆمەتباری سێیەم: ڕەحمان بێهرووزی، کوڕی کەریم و خەڵکی سەرپێڵی زەهاو، تۆمەت: هاوکاری لە خراپەکاری و ئاژاوەنانەوە (مفسد فی الارض)، ساختەکردنی ناسنامە، کڕین و گواستنەوە و هەڵگرتنی چەکی سووک و قورس و تەقەمنی.

 

تۆمەتباری چوارەم: سەید ماجێد مورتەزایی کوڕی حوسێن و خەڵکی پاوە، تۆمەت: هاوکاری لە خراپەکاری و ئاژاوەنانەوە (مفسد فی الارض) کە شیاوی سێدارەیە

 

تۆمەتباری پێنجەم: سیرووس عەزیزی تەمەن ٣٢ ساڵ، کوڕی عەبدولخالق و خەڵکی پاوە، تۆمەت: بەغی بە تۆمەتی ئەندامەتی لە گرووپی تیرۆریستی داعش.

 

تۆمەتباری شەشەم: ئەیووب ئیسماعیلی، تەمەن ٢٨ ساڵ، کوڕی حوسێن و خەڵکی سەلاسی باوەجانی، تۆمەت: هاوکاری لە خراپەکاری و ئاژاوەنانەوە (مفسد فی الارض) کە شیاوی سێدارەیە، کڕین و گواستنەوەی چەک و چۆڵ و تەقمەنی.

 

تۆمەتباری حەوتەم: خوسرەو ڕەمەزانی میرئەحمەدی کوڕێ کاکە ئەحمەد تەمەن، ٤٢ ساڵ، تۆمەت: هاوکاری لە خراپەکاری و ئاژاوەنانەوە (مفسد فی الارض) کە شیاوی سێدارەیە، ئامادە کردن و هەڵگرتنی چەک و چۆڵ، کەڵک‌وەرگرتن لە بەڵگەنامەی ساختە.

 

تۆمەتباری هەشتەم: عوسمان بێهرووزی، برای تۆمەتباری سێیەم و تەمەن ٢٩ ساڵ و خەڵکی سەرپێڵ‌زەهاو، تۆمەت: هاوکاریلە خراپەکاری و ئاژاوەنانەوە (مفسد فی الارض) کە شیاوی سێدارەیە، ئامادە کردن و هەڵگرتنی چەک و چۆڵ و نیشتەجێکردنی تیمی تیرۆر.

 

بینای پەرلەمانی ئێران لە کۆتایی هاوینی ساڵی 2017 هێرشێکی گوماناویی کرایە سەر و دەستبەجێ داعش ئەو هێرشەی بەئەستۆ گرت. لەو هێرشەدا ١٧ کەس لە خەڵکی ئاسایی کوژران و ٥٠ کەسی دیکەش بریندار بوون.

 

بەپشت بەستن بە ئاماری  تۆمارکراو لە ناوەندی ئاماری رێکخراوی مافی مرۆڤی (هەنگاو) پاش ڕووداوی هێرش بۆ سەر پەرلەمانی ئێران، زیاتر لە ٢٠٠ کەس لە هاووڵاتییانی کورد لەو پەیوەندییەدا دەستبەسەر کران.

ھەواڵی زیاتر