کورسییەکە گرنگتر بوو یان خوێنەکە؟

لوقمان بیارەیی

«دووپشك گەر هاتە سەر ڕێت، یان بیكوژە یانیش خۆتی لێ لابدە» ئەمە قسەیەكی باوی كۆمەلگەی ڕۆژئاوایە…

ساڵی(2014)(داعش)(موسڵ)ی داگیر کرد، کەگەورەترین شاری عێراق بوو، قسەمان لە سەر چۆنیەتی هاتنی داعش بۆ عێراق و هۆكارەكانی پشت دروستبونی نیە، بەڵام جێگیربوونی داعش لە زۆنی سوننە بەگشتی و شاری موسڵ بە تایبەتی، چارەنوسی قەوارەی هەرێمی كوردستانی خستە سەر دووڕیانی مان و نەمان .

سەرەتا بارزانی وەك سەرۆكی هەرێم وتی بمانەوێ و نەمانەوێ ئێستا جیرانێكی تازەمان بۆ دروستبووە، شتێكی لەم جۆرە بوو ئیتر یانی لێدوانەكەم وەك خۆی لە بیر نەماوە، ئەم لێدوانەش لە سۆنگەی هەستكردن بە مەترسیە جیدیەكانی داعشەوە بوو بۆ سەر هەرێمی كوردستان،هەر بۆیە بارزانی سەرەتا ویستی بە هەر نرخێك بێت، كار نەگاتە ڕوبەڕوبونەوەی سەربازی لەگەڵ داعش، یانی جۆرێك بوو لە خۆ لادان لە دووپشكەكە، بەڵام دواجار هەر هێنایانەوە سەر ڕێی كورد و ئیتر كوردیش ناچار بوو مامەڵەی دووپشکەکەی لەگەڵ بکات، دیسان لێرەش لە لایەن وڵاتانی دەوروبەر و هەندێ كەناڵی ئیعلامی ناوخۆیی كوردستان، ئەركی پێشمەرگە كە كوشتنی دووپشكەكە بوو قورس تر ئەكرا .

بە ئاشكرا هەستی پێ ئەكرا تەركیزی داعش لە شەڕی خۆی بەرامبەر پێشمەرگە زیاتر لەسەر جەبهەكانی زۆنی پارتی بوو، ئەمەش لە بەر ئەوە بوو كە پارتی یەكەم دەستەڵاتی پایتەختی هەرێمی بە دەستەوە بوو، دووەمیش بە پراكتیك كاری لە سەر قۆستنەوەی دەرفەتێك ئەكرد بۆ ئەنجامدانی ریفراندم، ئەوە بوو زیاتر لە(3000)چەكداری داعش بە دوو ڕەتڵ بە ئاڕاستەی یەك ئامانج هێرشی كرد، ڕەتڵی یەكەمیان لە نزیك سنوری سوریاوە كە ئەكاتە كوردستانی ڕۆژئاوا و بە بەر چاوی هێزەكانی پەكەكەوە! ڕەتڵی دووەمیش لە(تەلەعفەر)ەوە، هەردوو ڕەتڵەكەی داعش لە(زوممار) یەكیان گرتەوە و سەرئەنجام زوممار كەوت! ئەم شارۆچکەیە بە ماشێنەڕێ، نزیکەی دوو کاتژمێر ئەبوو تا(شنگال)، ئەمەش بووە هۆی ئەوەی كە شنگال بكەوێتە ناو نەخشەی جەبهەی داعش و گەمارۆ درا و کەوتنی ئەوێش حەتمی مسۆگەر بوو، لەوەش سەیرتر ئەوەبوو کە كەوتنی زوممار و حەملەی ئیعلامی پەكەكە و حیزبەكانی سلێمانی بەیەكەوە و لە یەك تەوقیتدا لە دژی پارتی دەستیان پێكرد! پاشان هەڵهاتنی نزیكەی (1000) پێشمەرگەی لایەنێكی كوردستانی لەناو مەركەزی شنگالەوە بە ئاڵای حیزبەكەیانەوە و بە بەرچاو ئەو پێشمەرگانەوە كە لە سەنگەری بەرگریدا مابوونەوە، پاشە كشەیان كرد! ئەم پاشەكشە نا مونەزەم و گوماناویەش، پرسیاری لە سەر ئامانجی خودی هێزەكە دروست كرد،كە ئایا ئەم ژمارە بەرچاوەی پێشمەرگە كە پاشەكشە ئەكەن تا ئێستا لەكوێ بوون؟

ئەگەر فیعلەن وجودیان هەبوو، ئەی بۆ چی تا ئێستا تەنها سەنگەرێكیشیان وەرنەگرتبوو لە میحوەرەكە؟

كەسێك گەر زۆر یا كەم زانیاری لە سەر شەڕی جەبهەیی هەبێت، بە ئاسانی تێ ئەگات كە نەك هەزار كەس، بگرە پێنج سەد كەسیش بە ئۆتۆمبێلی پیك ئاب و لاندكروزەر بەیەكەوە بكەونە ڕێ، چەند ئۆتۆمبێل دەرئەچن و لەو كاتە هەستیارەدا و لەو زۆنە جەنگییەدا كە بە نیسبەت هێزی پێشمەرگەوە (بمانەوێ و نەمانەوێ بەهۆی كەمتەرخەمی و گەندەڵی هەندێك لە فەرماندەكانیەوە هێزێكی تا ڕادەیەك نا ئامادە بوو بۆ وەها شەڕێك!) چ جۆرە فشارێكی دەرونی و مەعنەوی لە سەر ئەو پێشمەرگانەی كە لە سەنگەر مابونەوە دروست ئەكەن! هەر ئەمەش نەبوو، داعش لەو تەوقیتەدا هێرشی سەرانسەری كردە سەر تەواوی میحوەرەكانی تری پێشمەرگە تا ئەگاتە میحوەری گوێڕ مەخمور و خازر و باشیك، بۆ ئەوەی پێشمەرگە نەتوانێ هێز لە میحوەرێكی ترەوە بگوازێتەوە بۆ بە دەمەوە چوونی میحوەری شنگال و ناوەران، هاوكات لە ناو زۆربەی گوندە عەرەبنشینەكانیشەوە لە پشتەوە لە سەنگەرەكانی پێشمەرگە درا .

لێرەدا مەبەستمە بڵێم: ئەوە پەكەكە دیاربوو كە دەیویست شنگال لە ژێر چنگی پارتی دەر بهێنێ و تەنسیقی تەواویشی هەبوو لەگەڵ وڵاتی ئەقلیمی و بگرە بەغدادیش ھەبوو، بەڵام بەرژەوەندی حیزبەكانی سلێمانی چی؟! جگە لەوەی تەنها ویستیان پارتی داماڵن لەو جەماوەرەی كە لە شنگال بە تایبەتی و دەشتی نەینەوا بەگشتی هەیەتی .

هەر تاكێكی كورد حەقی خۆیەتی لەو حیزبانە بپرسێ كە ئایا چەند كورسیەكی پارلەمان كە پارتی لە هەموو خولێکی هەلبژاردندا لەو ناوچانەدا بەدەستی ئەهێنا، گرنگتربوو لە خاكی كوردستان؟

گرنگتربوو لە جینوسایدی خەڵكی شنگال و دەوروبەری؟ گرنگتربوو لە خوێنی پێشمەرگە؟

عەرەب وتەنی(تجري الرياح بما لا تشتهي السفن)!لەوانەیە هەندێ جار دەرفەتەكان بقۆزینەوە بە سودی خۆمان، بەڵام دواجار سودی ڕاستەقینە ئەوەیە كە مرۆڤ (لە كایەی سیاسی بێت یان هەر گرفت و مەترسیەك) لە بری خۆ دزینەوە لە بەرپرسیاریەتی، قەبوڵی شكست بكات، ئەگەر چی زەرەریش بكات!

ھەواڵی زیاتر