ئۆپۆزسێۆنی خورمژ خۆر!

لوقمان بیارەیی

لە 11ی سیبتمبەری ساڵی 2001 كاتێك ڕێكخراوی قاعیدە هێرشیكردە سەر ئەمریكا، كۆماریەكان لە سەر دەستەڵاتبوون، بەڵام بەرلەوان دیموكراتەكان كە ئۆپۆزسێۆن بوون، وتیان: هەموومان کەمتەرخەمین و پێویستە خۆمان چاكبكەین!

لە هەرکوێ دەوڵەتێک یان حکومەتێکی بەهێز و ئەکتیڤ هەبوو، بێشک ئۆپۆزسێۆنێکی تەندروست لە پشتیەوەیەتی، لە کوێ حکومەت بەرەو گەندەڵی و ناشەفافیەت چوو، لە کوێ پێشێلی یاسایی و بەرژەوەندی گشتی کرد، ئەرکی ئۆپۆزسێۆنە چاودێری بکات و سنووری دەستەڵات و بەرپرسیاریەتی خۆی بۆ دیاری بکات، لە هەمووی گرنگتر لە کوێ بە هۆی هەڕەشە یان فشاری درەکییەوە باری بە لای کەوتندا بوو، ئەرکی ئۆپۆزسێۆنە پشتگیری و هاوکاری تەواوی بکات بۆ هەستانەوە، چونکە لە چوارچێوە نیشتیمانی و نەتەوەیی و سیاسیەکەدا دواجار حکومەت ماڵە گەورەکەی هەمووانە و پێویستە هەمیشە لە سەر پێی خۆی ڕاوەستاو و بەهێز بێت!

لە وڵاتی ئێمە ئۆپۆزسێۆن وەک ئەوەی کە نەیتوانیوە بە ئەرکی خۆی هەستێت، بە داخەوە هەندێکیشیان هەمیشە بە دوای هەلێکەوە بوون تا باری حکومەت قورستر بکەن، یانی بێ گوێدانە بەها ئەخلاقی و نیشتیمانیەکان، هەمیشە پێیان وابووە سەرکەوتنی خۆیان لە شکستی حکومەتەوەیە، سەرنج بدەن لە گەرمەی ئاڵۆزبوونی پەیوەندیەکانی حکومەتی هەرێمدا لەگەڵ بەغداد، ئەوان چاوساغ و ڕاوێژکاری بەغداد بوون! وەرن کەرکوک بە زەبری هێز وەربگرنەوە، دواتر بسوڕێنەوە بۆ(خورمەڵە و مەحمودیە و سحێلا)تا سەرچاوە داراییەکانی حکومەت ببڕن، ئێمەش لێرە لە لایەک بە پاساوی قەیران و گەندەڵی و بێ مووچەیی لە حکومەت دەکشێینەوە و داوای حکومەتی ئینقاز دەکەین! لە لایەکی تریش خەڵک هان دەدەین بێتە سەر جادە داوای مەعاشی خۆی و هەڵوەشاندنەوەی سیستمی پاشەکەوتی مووچە بکەن! تا حکومەت ناچاری گەڕانەوە بۆ بەغداد دەکەین، ئەوکات ئێوەش ڕازی مەبن بە ناردنی بودجە، تەنانەت گەر هەرێمیش بە هەموو مەرجەکانتان ڕازی بوو، ئێوە بڵێن: ئێمە ڕاستەوخۆ مامەڵە لەگەڵ پارێزگاکان دەکەین! ئا بەم شێوەیە دووری بۆ مەڕۆن نوشتە و دوعاشیان بۆ باتڵبوونەوەی ڕزقی حکومەتی هەرێم کردبێت! لە پێناو داماڵینی دەستەڵاتی پارتی و بارزانی لە کوردستان! دەی ئەمە ڕەفتاری ئۆپۆزسێۆنە یان دوژمن؟!

كێشەی ئێمە لێرەدایە، باخچەی خۆمان بە مڵە دسپێرین! پاسی جەڵەبی خۆمان بە گورگ دەسپێرین! خۆمان بە كاری خۆمان هەڵناسین، تا شایەرەکانی بە ناو ئۆپۆزسیۆن نەیێن پێمان بڵێن لێرەوە بڕۆن! خۆمان ناتوانین بڕیار بدەین! چونکە كۆمەڵگەیەكی موتابیع و ماتماتیك و وریا نین، توانای هەڵسەنگاندنی سیاسی و سزادانی لایەنی کەمتەرخەممان نیە، هوشیاری سیاسی لاوازە، ئیتر ئەحزابیش بەپێی ئاستی دنیابینی و موتابیعی ئێمە گەمە بە عەقڵمان ئەكەن! كاتێك کەسێکیش دێ ڕاستیەکانمان بۆ ڕوون دەکاتەوە، یەكسەر پێش ئەوەی بیربکەینەوە، تاوانباری دەکەین بە پیاوی دەستەڵات, بە كۆیلە و نازانم چی!

ئەها ئیتر ئۆپۆزسێۆن لە ئەمریکا بێت یان ئەوروپا، لە ترسی هۆشیاری تاك بەرپرسیاریەتی دەخاتە ئەستۆی خۆی، لای ئێمەش ئۆپۆزسێۆن خورمژ خۆرە! باخەڵی لای دەستەڵاتە و دڵیشی لای شەقام .

ھەواڵی زیاتر