رووداوەكانی رۆژئاوای كوردستان – ئەجێندانی پەكەكە لە باشوور

بیروڕا – ھەكار ھەركی

یەپەگە و بەردەوامی ڕادەستكردنی خاك:-

رووباری فوڕات رۆژئاوای كوردستانی كردووتە دوو بەش، بەشێكی رۆژھەڵاتی فوڕات و بەشەكەی دیكە بە رۆژئاوای فوڕات ناسراوە، لە سەرەتای سالی ٢٠١٥ توركیا ھوشداری دایە یەپەگە نابێت پێ بنێتە ناو رۆژئاوای فوڕاتەوە ئەوە بوو یەپەگە لە رێگای بەنداوی تشرینەوە چووە ناو رۆژھەلاتی فوڕات و تەحەدای توركیایی كرد، دواتر بەرەو منبج و رەقە كەوتەڕێ، لەوێ رووبەرووی داعش بووەوە زیاتر لە ١٨ ھەزار كوڕی كوردی بە شەھیدكردندا، تموحی یەپەگە بۆ رەقە و منبج وەك جێبەجێكردنی سیاسەتی (كەری دێز) وابوو، كەری دێز بە كەرێك دەگوترێت كە حەز لە تۆپینی خۆی و زەرەری خاوەنەكەی بكات (كاتی خۆی مام جەلال ئەمەی بۆ پەكەكە بەكار ھێناوە)، ئەوكاتەی ھێشتا یەپەگە منبج و رەقەی كۆنتڕولنەكردبوو، عەفرینی لەدەست بوو، بەلام بەھۆی تەحەدیەكان ئێستا ھەم عەفرینی دوڕاند و ھەم رەقە وا خەریكە منجیش لەدەست دەدات.

لە ئێستادا یەپەگە خەریكی خۆ كۆكردنەوەیە بۆ ئەوەی بە تەواوی لە رۆژھەڵاتی فوڕات بكشێتەوە و ڕادەستی توركیایی بكات، لە ماوەكانی ڕابردووشدا بەشار ئەسەد گتبووی دەبێت یەپەگە رۆژھەلاتی فوڕاتمان بداتەوە چونكە ئێمە ڕادەستی ئەوانمان كردووە، كەواتە ئێستا ھیچ ناوچەیەكی كوردی بەدەست یەپەگە نەماوە كە خۆی بە دەستی ھێنابێتەوە، بەلكۆ ھەموو ئەو شوێنانەی لە دەستە كە حكومەتی بەشار كاتی خۆی بە (ئەمانەت) ڕادەستی كردوون، جگە لە كۆبانێ كە داعش بە رێكەوتن رادەستی یەپەگەی كردەوە.

پەكەكە و جێبەجێكردنی ئەجێندای توركیا:-

پەكەكە و باڵەكانی خەریكن ئیمپراتوریەتی عوسمانی بۆ توركیا دروست دەكەن، ھەر شوێنێت توركیا بیەوێ داگیری بكات سەرەتا پەكەكەی لێ جێگیر دەكات، نمونەی منبج و ئیدلب و عەفرین و شنگال و قەندیل.

پێشتر دەگوترا لە ١٠ ئەندامی پەكەكە ٧ـیان سەر بە میتن و سێیان گەڕیلا، بەلام ئێستا لەم ١٠ ئەندامە بە دەگمەن گەڕیلا دەبینرێت، باقی ھەمووی میت و ئیتڵاعاتن، ئەگەر وا نیە بوچی ئەندامێكی پەكەكە نیە گلەییەكی برایەنە لە سەركردایەتی خۆی بكات و بلێت”ئەرێ ئێوە چ فرۆشیارێكن! ئەو ھەموو شەھیدانە بۆ ئەوە بوون وا بەئاسانی شوێنەكانیان بفرۆشن؟”.

پەكەكە لە كوردستانی رۆژھەلات خەریكی پاراستنی سنووری ئێرانە، لە باكۆر خەریكی سیاسەت و ھەڵبژاردنە، لە رۆژئاوای كوردستان خەریكی خاك ڕادەستكردنە، لە باشوور كوردایەتیمان بۆ دەكات! ئەرێ بە جدی باشوور داگیر كراوە یان سێ پارچەكەی دیكە؟!.

پەكەكە ئەگەر نەیەوێ باشوور وەك رۆژئاوای لێبێت و چەكدارەكانی سولتان موراد و بەرەی نەسرە و كۆنەداعشەكان لەم شاخانە مولگە دروست بكەن، دەبێت بە بریارەكی كوردستانیانە ھەر ئەم شەو ڕاگەیەندراوێك دەربكات و بلێت”داوا لە پێشمەرگەی ھەرێمی كوردستان دەكەین ئەو شوێنانەمان لێ وەرگرنەوە كە دەكەونە ناو ھەرێمی كوردستانەوە”، بەدەر لەمە ئەوەی پەكەكە لە باشوور دەیكات خیانەت و جاشایەتی و تیرۆرستی و رێگری و چەتەییە، تاكەی ئاژەڵداری كورد بە زۆری چەك ٪‏٣ـی مەڕەكانی بە پەكەكە بدات یان جوتیارێكی دەست ماندوو ٪‏٣ پیاز و باینجان و تەماتە و خەیاری بە پەكەكە بدات ؟ تاكەی مانگێ جارێك ھەواڵی ڕفاندنی گەنجێكی باشوەری لەلایەن پەكەكەوە ببیستین؟

ھاتنی توركیا بە شێوەیەكی فەرمی بۆ ناو ھەرێمی كوردستان مەترسیەكی زۆر گەورەیە، چونكە توركیا داینەمووی دروستكردنی دەیان جور چەكداری تیرۆرستیە، توركیا خاوەنی دەزگایەكی مخابەراتی زۆر گەورەیە، ئەگەر لەمە زیاتر پەكەكە توركیا پەلەكێشی باشوور بكات، دوور مەبینە ئەوەی چاندراوە لەم ھەرێمە و دەستكەوتەكانی ھەمووی بەبادا بچێت، ھیوادارم ئەمە ئامانجی پەكەكە نەبێت و ھەرچی زووە خۆی كۆ بكاتەوە و بیانو بە توركیا نەدات ھێزەكانی زیاتر بھێنێتە ناو قۆلایی خاكی باشووردا.

ھەكار ھەركی

ھەواڵی زیاتر