پڵنگەكەی یەكێتی و کۆمەڵێک ئەفسەرلە سلێمانی هاتنە نێو پارتی

بە دەیان پلەباڵا و ئەفسەر و رێكخستنی پێشمەرگە لە سلێمانی لە ناو ریزەكانی یەكێتیی نیشتمانیی كوردستان، پێوەندییان بە پارتی دیموكراتی كوردستان كرد. ئەندامێكی سەركردایەتیی پارتی دیموكراتی كوردستانیش دەڵێ، ئەوانە بەڵێنیان داوە بۆ هەمیشە لەسەر رێبازی بارزانی بن.

رزگار ئەژی گۆران ئەندامی سەركردایەتیی پارتی دیموكراتی كوردستان لە سلێمانی و هەڵەبجە، رایگەیاند، ژمارەیەك لە ئەفسەری پێشمەرگە و رێكخستنەكانی یەكێتیی نیشتمانیی كوردستان لە سلێمانی، بە خۆیان و كەسوكاریان پێوەندییان بە ریزەكانی پارتی كردووە، دووپاتیان كردووەتەوە كە كار بۆ سەرخستنی پارتی دەكەن و بۆ هەمیشە لەسەر رێبازی بارزانی دەبن.

ئەوەشی گوت، لە ناویاندا عەلی شێرۆ پڵنگ هەیە كە پلەباڵایە لە ناو پێشمەرگە و لەگەڵ ژمارەیەك لە ئەندامانی رێكخستنەكانی ئەو حزبە، سەردانی ئەنجوومەنی سەركردایەتییان كرد و پارتیبوونی خۆیان راگەیاند.
عەلی شێرۆ پڵنگ رایگەیاند، “پلەی عەقیدم هەیە و لەناو پێشمەرگەی سەربە یەكێتیی نیشتمانیی كوردستان بووم، خۆم و زیاتر لە 40 ئەفسەری تر، بە خۆیان و كەسوكاریانەوە پێوەندییان بە ریزەكانی پارتی دیموكراتی كوردستان كرد، پێمان وایە ئەوەی خەمخۆری كوردستانە تەنیا پارتییە”.

ئەو گوتی، دوای ئەوەی بۆیان روون بووەوە كە پارتی حزبێكە داكۆكیكار و بەرگریكارێكی راستەقینەی مافەكانی كوردە و كار بۆ سەربەخۆیی و پێكەوەبوون دەكات، بۆیە ئەو بڕیارەیان دا و بۆ هەمیشە لەگەڵ پارتی دیموكراتی كوردستان دەمێننەوە و كار بۆ سەرخستنی دەكەن. ژمارەیان زۆرە و لە چەند رۆژی داهاتووشدا ژمارەیەكی تر لە ئەفسەرانی پێشمەرگە، پێوەندی بە ریزەكانی پارتی لە سلێمانی دەكەن.