گەرما تەواو بوو، بارانبارین دەست پێدەکات

کەشناسى سلیمانى رایدەگەیەنێت؛ گۆڕانکارى تەواو بەسەر رەوشى کەشوهەوادادێت و پلەکانى گەرما بەشێوەیەکى بەرچاو دادەبەزن و نمە باران دەستپێدەکات.

بەڕێوەبەرایەتى کەشناسى سلێمانى رایگەیاند: لە ئەنجامى هاتنى نزمە پاڵە پەستۆى کەنداوى عەرەب و نیمچە دورگەى عەرەب کەشى ناوچەکەمان گۆڕانکارى بەسەر دێت .ئەم گۆڕانکارییە لە کەشى ناوچەکەمان تا رۆژى هەینى بەردەوامى دەبێت، پلەکانى گەرما نزم دەبێتەوە بە تایبەت سبەى پێنج شەممە بە نزیکەى 4-6 پلەى سیلیزى .

باسى لەوەکردووە، ئەمڕۆ چوارشەممە، ئاسمان بە گشتى نیمچە هەور لەگەڵ هەورى تەواو دەبێت لە زۆربەى کاتەکان لەگەڵ زیادبوونى خێراى با بۆ سەرووى 30 کم، ئەگەرى بەرزبوونەوەى تۆزوخۆڵ هەیە لەسەر بەشێک لە سنوورى پارێزگاى هەولێر و سلێمانى و کەرکووک.

دەشڵێت: بۆ ئەمڕۆ، پلەکانى گەرما بە نزیکەى (2-3 ) پلەى سیلیزى دادەبەزن و ئەگەرى پڕوشکە باران لەسەر بەشێک لە ناوچە شاخاوییەکان لە هەندێ کاتدا.