بە نووسراوێکی فەرمی داوا لە حکومەتی عێراق کرا پارە بۆ دامەزراندنی مامۆستایانی وانەبێژ تەرخان بکرێت

نوێنەری مامۆستایانی وانەبێژ و ئالان حەمەسەعید، وەزیری پەروەردەی هەرێمی هەرێمی کوردستان و ئەنجوومەنی وەزارەتەکە کۆبوونەوە.

کارۆخ عەبدوڵڵا گوڵاوی، نوێنەری مامۆستایانی وانەبێژ گوتی، کۆمەڵێک بابەتی گرنگ لەبارەی دۆسیەی مامۆستایانی وانەبێژ باسکران، “ناوی سەرجەم مامۆستایانی وانەبێژ کە 37 هەزار و 740 وانەبێژن، ئەمڕۆ دووشەممە 22ی نیسان، نێردران بۆ حکومەتی عێراق بۆ دامەزراندنیان بەشێوەی گرێبەستی هەمیشەیی.”

تایبەت بەوانەبێژانی بەخشراو (ئەوانەی ساڵانی رابردوو وانەبێژ بوون ناویان لە ریزبەندی پەروەردەکاندا هەیە و لادراون)، کارۆخ عەبدوڵڵا گوتی، “داوای ناو و زانیارییان دەکرێت بۆ ئەوەی بنێردرێن بۆ وەزارەت.”

کارۆخ عەبدوڵڵا دەڵێت، وەزیری پەروەردە پێی راگەیاندوو کە “حکومەتی ناوەند رەزامەند بێت یان نا مامۆستایانی وانەبێژ هەر بەشێوەی گرێبەست دادەمەزرێن.”

شایستەی مانگانەی مامۆستای گرێبەست بۆ بڕوانامەی دبلۆم 400 هەزارە و بۆ بەکالۆریۆس 500 هەزار دینارە.