لێدوانی ئەردۆغان لەبارەی سەردانەکەی بۆ هەرێمی کوردستان و رازاندنەوەی شەقامەکانی هەولێر

رەجەب تەیب ئەردۆغان، سەرۆککۆماری تورکیا لەبارەی سەردانەکەی بۆ هەرێمی کوردستان و عێراق قسەی بۆ رۆژنامەڤانان کرد و بەشێکی قسەکانی تایبەت بوو بە پێشوازیکردنی لە هەولێر.

سەرۆککۆماری تورکیا سەبارەت بە رازاندنەوەی شەقامەکانی هەولێر و بوونی ئاڵای تورکیا شانبەشانی ئاڵاکانی کوردستان و عێراق لە شەقامەکان قسەی کرد و رایگەیاند، رازاندنەوەی شەقامەکانی هەولێر بەو جۆرە ئاماژەیە بە پەیوەندیی دۆستانەی نزیکی نێوان تورکیا و حکومەتی هەرێمی کوردستان.

سەرۆککۆماری تورکیا زیاتر لەبارەی پەیوەندییەکانی نێوان هەولێر و ئەنقەرە قسەی کرد و گوتی، خواستی بەرەوپێشبردنی ئەو “هاوکارییە”ی لەنێوان هەردوولا بنیاتنراوە، بەردەوامە.