ڕاییکردنی مامەڵەی شۆفێران لە به‌ڕێوه‌به‌رایه‌تیی گشتیی هاتوچۆی هه‌ولێر بۆ ماوەیەکی کاتیی ڕاگیرا.
بەهۆی لێدانی هەورەبرووسکە لە تاوەری هێڵی ئینتەرنێت، ڕاییکردنی مامەڵەی شۆفێران لە به‌ڕێوه‌به‌رایه‌تیی گشتیی هاتوچۆی هه‌ولێر بۆ ماوەیەکی کاتیی ڕاگیرا.
به‌ڕێوه‌به‌رایه‌تیی گشتیی هاتوچۆی هه‌ولێر لە ڕاگەیەندراوێکدا ئاشکرای کرد، نزیکەی کاتژمێر 03:10ـی بەرەبەیانی ئەمڕۆ دووشەممە، 06-05-2024، هه‌وره‌برووسکەیەکی بەهێز لە تاوەری هێڵی ئینتەرنێتی بەڕێوەبەرایەتییەکەی داوە، ئەوەش بووەتە هۆی ڕاگیرانی ڕاییکردنی مامەڵەی هاووڵاتییان.
بەڕێوەبەڕایەتیی هاتوچۆی هەولێری داوا لە شۆفێران دەکات، سەردانیان نەکەن “تا ئەوکاتەی سیستەم و هێلی ئەنتەرنێت دەکەوێتەوە کار”.
لەلایەکی دیکەوە، بەیانیی ئەمڕۆ دووشەممە، نزیکەی کاتژمیر 10:00، هەورەبرووسکە لە بەردەم بەڕێوەبەرایەتیی گشتیی هاتوچۆی هەولێر لە هاووڵاتییەکی دا. بە گوێرەی زانیارییەکان، هاووڵاتییەکە شۆفێری تەکسی بووە و ڕەوانەی نەخۆشخانە کراوە، ئێستا تەندروستیی جێگیرە.
