کەشناسی :خۆڵبارین و باران سەرجەم هەرێمى كوردستان دەگرێتەوە.

لە چەند ناوچەیەکی هەرێم خۆڵبارینێکی چڕ دەستی پێکردووە و بەپێی پێشبینییەکانی کەشناسی، خۆڵبارین و باران سەرجەم هەرێم دەگرێتەوە.

بەپێی راگەیاندراوی کەشناسی، پێشبینی دەکرێت شەپۆلی خۆڵبارین و تاوەباران سەرجەم هەرێم بگرێتەوە و بۆ ماوەی چەند رۆژێک بەردەوام بێت.

پێشتریش کەشناسی هۆشداری دابوو لە گەیشتنی شەپۆلێکی تۆزوخۆڵ و بارانبارینی بەخوڕ بە ناوچە جیاوازەکانی هەرێم و ئەوەشی خستبووە روو، چەقی شەپۆلەکە لە رۆژانی پێنجشەممە و هەینیدا دەبێت.
کەشناسی هەرێمى كوردستان راشیگەیاندبوو، پلەکانی گەرما بەشێوەیەکی بەرچاو روو لە نزمبوونەوە دەکەن.

ئەوەش لە کاتێکدایە، هەر لەبارەی شەپۆلی بارانبارینەوە کەشناسی هۆشداری دابووە جوتیاران تاوەکو دەتوانن ئەو بەرهەمانەی قابیلی دروێنەکردنن دروێنەیان بکەن و بەرهەمە کشتوکاڵییەکانیان بپارێزن.