بەپەلە،سامان گەرمیانی ئەوەی لە ژێر بەرەبوو ھێنایە سەر بەرە و دۆخەکەی تەقاندەوە
ئەندامێکی سەرکردایەتی یەکێتی باس لەوە دەکات، پێش کۆنگرە پڕوپاگەندە دژی خۆی و خێزانەکەی بڵاودەکرێتەوە. دەشڵێت، بەشداریی کۆنگرە دەکات و ئامادەیە بۆ دادگاییکردنی لەبەرامبەر ئەو تۆمەتانەی دراونەتە پاڵی.
سامان گەرمیانی، لە پەڕەی تایبەتی خۆی لەتۆڕی کۆمەڵایەتی فەیسبووک، نامەیەکی کراوەی ئاراستەی جێگرانی سكرتێری گشتی و مەكتەبی سیاسی و سەركردایەتی و ئەنجوومەنی ناوەندی یەکێتی دەکات و دەڵێت: “لەدوای بەربژێرکردنم بۆ وەرگرتنی پۆستێکی باڵا لە حکومەتی نوێدا کەسانێک هەستاون بە تۆمەتبارکردنم بە هەڕەشە و پەلاماردان. ئێستاش کە بەرەو کۆنگرە دەڕۆین بۆ جاری دووەم دەستکراوە بە بڵاوكردنەوەی پڕوپاگەندە و درۆی بێبنەما لەسەر بەندە و خێزانەکەم، وەکو بەشێك لە پیلانگێڕی بۆ تێپەڕاندنی دۆخی كۆنگرە و دروستکردنی دووبەرەکی لەنێو یەکێتی”.
گەرمیانی دەڵێت: “ئەمە شێوازێکی زۆر قێزەونە بۆ بەدەستهێنانی مەرامە گڵاوەكانیان كە یەكێتی وەك كۆمپانیایەك دەبینن بۆ تێركردنی ئارەزووەكانیان یاخوود بۆ بەشبەشکردنی یەکێتییەکەمان و رێگریکردن لە پرۆسەی نوێبوونەوە و گەڕانەوە بۆ لووتکە”.
سامان گەرمیانی، ئەندامی سەرکردایەتی یەکێتی راگەیاند: “حیزبەکەم بەڵێنیان پێداوم هەوڵی رژدی بدەن بۆ دۆزینەوەی ئەو کەسانەی هەوڵی ناشیرینکردنی من دەدەن بە ناڕاستەوخۆ، لێپرسینەوەیان لەگەڵدا بکرێت، سەرکردایەتیش پێیانڕاگەیاندووم ئەوانە وەک سەگوەڕ دەبینن و ناتوانن مێژووم ناشیرین بکەن”.
ئەندامەکەی سەرکردایەتی یەکێتی نیشتمانی کوردستان دەڵێت: “ئەوەی پێمکرابێت بۆ یەکڕیزی نەتەوەکەم کردوومە و لەمسەری راست بۆ ئەو پەڕی چەپ رێزمگرتوون، یەکێکبووم لەو سەرکردانەی یەکڕیزی حیزبەکەم پاراستووە. بەڵام کەسانێک هەن چاویان بەمنێک هەڵنایەت کە لە دانوستاندنەكەی ساڵی 1984 بەعسییەکان لە هەموو پێشمەرگەی كوردستان خۆشبوون تەنیا لە (شەهید سەید كەریم، مامە ڕیشە، ئازادی سەگرمە و من ) نەبێت، چونكە هەرشوێنێك بەعس و بەكرێگیراوانی بەعسی لێ بووبێت بەبێ سڵەمینەوە بەسزای گەل و شۆڕشمان گەیاندوون. ئێستاش خەڵکانێک هەن هاتوون من بە راپۆرتنووس و جاسوس و مەوقیف فرۆش و فایلدار نێو دەبەن”.
لەبارەی بەشداریی لە کۆنگرە و ئەو پۆستە باڵایەی بڕیاربوو وەریبگرێ، سامان گەرمیانی گوتی “بەشداری کۆنگرە دەکەم، ئەو پۆستەباڵایەی بڕیاربوو وەریبگرم پۆستی جێگری سەرۆکی هەرێمی کوردستان بوو، حیزبەکەم داوای لێکردم بکشێمەوە و خۆشم پێمباشبوو بکشێمەوە لەوەرگرتنی ئەو پۆستە”.
لە نامەکەیدا سامان گەرمیانی باس لەوەدەکات “خیانەتم لە خاك و وڵات و یەكێتی نەكردووە! رووخانی رژێم زۆر شتی روونكردەوە. ئێستاش لێرەوە تەحەدای هەرچی راپۆرتنووس و جاسوس و مەوقیف فرۆش و هتد ، دەكەم بەهەموو تەمەنی پێشمەرگایەتی و سیاسیم و ئەمڕۆشی پێوەبێت، ئەگەر شتێكیان لایە لەسەر ئەخلاقی سیاسی و كۆمەڵایەتی و تەهریب وتاڵانفرۆشی و نەوتفرۆشی و پەیوەندی ژێربەژێری ئەملا وئەولام. بێ یەك ودوو بڵاوی بكەنەوە و ئامادەی دادگایی گەل دەبم لە پێش دادگایی پەروەردگار”.
