مەلا بەختیار: چ شەرمەزارییەكە تەعریب بێتەوە خانەقین و كورد رابكەن

ئەمڕۆ یەكشەممە مەلا بەختیار لێپرسراوی دەستەی كارگێڕیی مەكتەبی سیاسیی یەكێتی لە كۆبوونەوەیەكدا لە خانەقین رایگەیاند ڕێگە نادەن جارێكی تر عەرەب بە عەقلیەتی شۆڤێنیەوە بگەڕێنەوە خانەقین، لەمبارەیەشەوە هەموو ڕێگەیەكی مەدەنی و دادگاكان دەگرنەبەر. گوتیشی چ شەرمەزارییەكە تەعریب بێتەوە خانەقین و كورد رابكەن.

 

مەلا بەختیار لە میانی پێشوازیكردنی لە ژمارەیەك گوندنشین و كەسایەتی عەشیرەتەكانی گەرمەسێر و دەوروبەری خانەقین، جەختی لە پشتیوانی خۆی بۆ كردنەوە و راشیگەیاند “چ شەرمەزارییەكە تەعریب بێت‌ و ئێوە لە خانەقین رابكەن، ئایا لەم شەرمەزاریە گەورەتر هەیە بۆ مرۆڤ، بۆ خێزانەكان‌ و بۆ بنەماڵە‌ و عەشیرەتەكان؟ ئەگەر نیە، ئیتر بۆ دەبێ‌ ئەم شەرمەزارییە قبووڵ بكەن؟ نەخێر قبووڵی ناكەین‌ و هەموو رێگەكانیش دەگرینەبەر بۆ ئەوەی شەرمەزاری مێژوو، شەهیدەكانمان‌ و خەڵكی شارەكەشمان نەبین”.

لێپرسراوی دەستەی كارگێڕیی مەكتەبی سیاسیی یەكێتی لە هەژماری خۆیدا لە تۆڕی كۆمەڵایەتی (فەیسبووك) بڵاوی كردەوە كە لە دیدارەكەدا پرۆسەی تەعریبی وەكو پیلان‌ و پرۆسەیەكی شۆڤێنی بەعس لە ماوەی ساڵانی حوكمڕانیدا خوێندەوە، كە لەسەر خاك‌ و ئاوی كوردستان هەوڵی بەردەوامی جێبەجێكردنی دراوە‌ و قازانجێكی زۆری لێ كراوە‌. ئەوەشی گوتووە كە بە داخەوە هەتا ئێستە سەرەڕای گۆڕینی چەندین حكومەت، هێشتا مادەی سەدوچل جێبەجێ نەكراوە‌. ئەمەشی بە مایەی ئەو كاریگەرییە پۆزەتیڤە ناو برد، كە ڕووبەڕووی خەڵكی رەسەنی ناوچە تەعریبكراوەكان بووەتەوە و دڵنیاییشی دا لە بەرامبەر ئەو هەوڵ‌ و هەنگاوانەی دەیەوێ‌ جارێكی تر پرۆسەیەكی نوێی تەعریب دەست پێبكات، هەموو هەوڵێكی خۆیان دەخەنەگەڕ و رووبەڕووی هەر هەنگاونانێك دەبنەوە، كە ئامانجی گەڕانەوەی تەعریبی خاك‌ و ئاوی كوردستان بێ‌.

مەلا بەختیار رایگەیاند ئەگەر لە رابردوودا لە شاخەوە گوتبێتمان لەگەڵتانین‌ و لەگەڵیشتاندا بووین، ئەوا ئێستە كە لەناوتانداین، بێگومان گەرموگوڕتر لە جاران پشتیوان‌ و هاوكارتانین‌ و لەگەڵتانداین‌ و لەو پێناوەشدا هەموو رێگەیەكی یاسایی‌ و مەدەنی دەگرینەبەر.

هەروەها ئەوەشی راگەیاندووە كە هەموو ناوچەكانی مادەی 140، كێشایان هەیە‌ و لە ئێستەشدا بیستوویانە كە دەیانەوێ‌ دەرفەتی دوای ریفراندۆم‌ و شازدەی ئۆكتۆبەر بقۆزنەوە‌، گوایە هەندێك عەرەبی تەعریب دەیانەوێ‌ بگەڕێنەوە ناوچەكە، بەڵام با دڵنیابن تا هەموو هێزە كوردستانییەكان هەبن، تا حكومەتی كوردستان‌ و مادەی 140 هەبێ‌، ئەوا بە عەقڵیەتی شۆڤێنی ناتوانن بگەڕێنەوە بۆ خانەقین‌ و هەموو رێگە یاسایی و مەدەنییەكانیش دەگرنەبەر و لە داگاكان شكات دەكەن‌ و گونجاوترین رێگەی مەدەنی بۆ بەرپەرچدانەوەیان لە دژی هەموو هەنگاوێكی تەعریب لە ناوچەكە دەگرنەبەر.

ھەواڵی زیاتر