قایمقامی کەرکووک: گەشبینین بە چارەسەکردنی کێشەکانی کەرکووک

قایمقامی کەرکووک كۆبوونەوەی ئەنجوومەنی پارێزگای كەركووك كە چاوەڕوان دەكرێت لە هەولێر ئەنجام بدرێت بە هەنگاو و دەستپێشخەرییەكی باش وەسف دەکات.

 

كامیل ساڵەیی، قایمقامی ناوەندیی كەركووك ڕایگەیاند: “ئەنجامدانی كۆبوونەوەی ئەنجوومەنی پارێزگای كەركووك هەنگاوێكی باشە بۆ ئاساییكردنەوەی هەموو بارودۆخەكە كە یەكێكیان كاراكردنەوەی ئەنجوومەنی پارێزگای كەركووكە”.

 

گوتیشی: “ماوەی ساڵێك و چوار مانگە بەشێكی بەرچاو لە ئەندامانی لیستی برایەتی لە ئەنجوومەنی پارێزگای كەركووك ئاوارەی شاری هەولێر بوونە، بەهۆی رووداوەكانی 16ی ئۆكتۆبەرەوە، ئەو كۆبوونەوەیەش كە چاوەڕوان دەكرێت لە هەولێر ئەنجام بدرێت هەنگاو و دەستپێشخەرییەكی باشە بۆ ئەوەی بگەنە ئەجێندای ئەو كۆبوونەوەیەی كە دوابەدوای ئەمە دێ بۆ چارەسەركردنی هەموو ئەو تێبینی و گرفتانەی لەماوەی رابردوودا هاتووەتە ئاراوە”.

 

قایمقامی کەرکووک دەشڵێ: “ئێمە گەشبینین و چاوەڕوان دەكەین ئەو كۆبوونەوەیە سەركەوتوو بێت و بەدوایدا كۆمەڵێك كۆبوونەوەی دیكە دێت كە هیوادارین ببنە چارەسەری بۆ كێشەكانی كەركووك”.

لەبارەی ئەوەی ئاخۆ ئاساییە ئەنجوومەنی پارێزگای کەرکووک لە شوێنێكی دیكە و شارێکی دیکە كۆببێتەوە؟ كامیل ساڵەیی، گوتی: “ئەندامانی ئەنجوومەن دەتوانن بڕیار لەسەر شوێنی كۆبوونەوە بدەن، بەڵام ئەمەی بەسەر كەركووك هێنرا، ئەو کۆبوونەوەیەی هەولێریش دەبێتە هەنگاوێکی باش بۆ ئەوەی بارودۆخەكە ئاسایی بێتەوە، ئومێدەوارین كە كۆبوونەوەكە بكرێت و وەك كلیلێك بێت بۆ كردنەوەی دەرگای چارەسەری كێشەكانی كەركووك”.

 

لە دوایین كۆبوونەوەی مەكتەبی سیاسیی پارتی و یەكێتییدا بڕیاردا کە ڕۆژی(١٨-٢-٢٠١٩) کۆبوونەوەی ئەنجوومەنی پارێگای کەرکووک لە شاری هەولێر ئەنجام بدرێت.

ھەواڵی زیاتر