یەكێتی قەناعەتی بۆ توركیا دروست كرد كە پەكەكەیان لە سلێمانی دوورخستووە… كاتی دەستپێكردنەوەی گەشتی فڕۆكەخانەی سلێمانی بۆ توركیا ئاشكراكرا

دوای ئەوەی یەكێتی نیشتیمانی كوردستان، بارەگاكانی سەر بە پەكەكەی لە شاری سلێمانی داخست و فرۆشتنی كتیبەكانی عەبدوڵا ئۆجەلانی لەم شارە قەدەغە كرد، ئەمرۆ وەفدێكی هێڵی ئاسمانی توركیا سەردانی فڕۆكەخانەی نێودەوڵەتی سلێمانی كردووە و بەڕێوەبەری فڕۆكەخانەكە دەڵێت: “بڕیار دراوە ڕۆژی 24ی ئەم مانگە یەكەم گەشت دەستپێبكاتەوە”.

تاهیر عەبدوڵا، بەڕێوەبەری گشتی فڕۆكەخانەی نێودەوڵەتی سلێمانی لە لێدوانێكی ڕۆژنامەوانیدا ڕایگەیاندووە، بەمەبەستی دەستپێكردنەوەی گەشتەكانی نێوان فڕۆكەخانەی سلێمانی و توركیا، وەفدێكی تایبەتی هێڵی ئاسمانی توركیا سەردانی فڕۆكەخانەی سلێمانیان كرد.

ئاشكراشی كردووە، كە وەفدەكە سەردانی هەموو بەشەكانی فڕۆكەخانەیان كردوە و خۆشحاڵی خۆیان دەربڕیوە بۆ ئاستی بەرزی فڕۆكەخانەی سلێمانی بەپێی یاسای فڕۆكەوانی.

دەشڵێت: “بڕیاریانداوە ڕۆژی 24ی ئەم مانگە یەكەم گەشت دەستپێبكاتەوە و هەفتانە 7 گەشت لەنێوان فڕۆكەخانەی سلێمانی و توركیا دەبێت”.

داخستنی گەشتی فڕۆكەكان لە سلێمانیەوە بۆ توركیا دوای ئەوە ھات كە ساڵی ڕابردوو وەزیری دەرەوەی توركیا ڕایگەیاند”ھۆكاری داخستنی گەشتەكانی سلێمانی – توركیا بۆ ھەبوونی ھەژموونی پەكەكە لە سلێمانی دەگەڕێتەوە”.

بۆ ئەم مەبەستە، ماوەی دوو مانگە یەكێتی نیشتیمانی كوردستان دەستی كردووە بە داخستنی بارەگاكانی سەر بە پەكەكە و گرتنی لایەنگرانی ئەم حزبە، لەم ھەشتەیەشدا ٥٠ كچ و كوڕی نزیك لە پەكەكە لە پاركی ئازادی شاری سلێمانی دەستگیركران”.

ھەواڵی زیاتر