ئای خودا کورد بوون چەند تالە

ئای خودا کورد بوون چەند تاڵە :

چ كارەساتێكە لەسەردەمی نوێدا بژیت و جیهان ئەوەندە بچووك بووبێتەوە لە ناوماڵێك نزیكتر بووبیتەوە لەیەكتر ،بەڵام نەتەوەیەك لەبەردەم چەقۆی چەند دەوڵەتێكدا خوێنی لێبچۆڕێت.

ئێمە بەرلەوەی باجی مانەوە بدەین دەبێ باجی كوردبوونیش بدەین ،لەوێ لە رۆژهەڵات بەبەرچاوی دروشمە قەبەكانی ئازادی و مافی مرۆڤ ودیموكراسی جیهانی كوڕە كوردەكان ملیان دەكرێت بەپەتدا وكەسیش ناڵێت ئەم دڕندەییە ڕاگرن .

لە باشور جەستەمان بەبەچاوی دونیاوە وبارەگاكان بە موشكەكی دورهاوێژ خوێناوی دەكرێن و خەڵك تیرۆردەكرێت و حەشد بەسەر جەستەی پێشمەرگەدا دەڕوات‌ كەچی خەمسارد لە جیهان دەڕوانین و لامان وایە ئەوانی ئازادیخواز ئێمە دەپارێزن.

لەباكوری وڵاتەكەم پەرلەمانتار لەسەر هەق زیندانی دەكرێت وكوردبوون وەك كوفر و بدعە لای حزبەكەی ئەردۆغانی ئیسلامی تەماشادەكرێت ،كەچی هیچ وڵاتێك ئەم كەڵبەتیژانە نابینێت كە بەربوونەتە كورد.

لە رۆژئاواش كۆبانی وعەفرین وەك خوانی بەردەم گورگەكان دانران ،بئ ئەوەی مافی مرۆڤی جیهانی بیانپارێزێت.

ئێمە نەتەوەیەكین ئەوەندە تەنهاین هەندێك جاریش خوداش بەدەنگ هاوار وگریانمانەوە نایەت .

ئێمە نەتەوەیەكین ئەوەندە بێ كەسین ، لەتاودا چەقەڵ ودڕندەكانیش دەكەینە دۆستی خۆمان .

ئەوەی روویدا لە كۆیە یەك ڕستەی بۆ دوپاتكردینەوە ،شتێك نییە ناوی كیان و دەسەڵاتی كوردی بێت ،ئێمە حەوشەی كراوەین هەر وڵاتێك بیەوێت دەتوانێت ئەم خاكە هەپرون بەهەپرون بكات بێ ئەوەی كەسێك ،وڵاتێك ،دروشمێك ،لەسەرمان هەڵبداتێت .

ئێمە نەتەوەیەكین لەدەرەوەی مێژووین نە دەوڵەتمان هەیە نە بوون ، بەنیسبەت جیهانی رۆژئاواوە ئێمە قەرەجی دابەشبووین. بەسەر كۆمەڵێك وڵاتدا .ئێمە لە سەر زەوی نەمانایەكمان هەیە ناوی كورد بێت نە شوینێكیش هەیە نوسرابێت كوردستان.

چەندین سەدەیە ئاوا دەژین. هەر شاخ و تاشەبەرد و كونە ئەشكەوتەكان دۆستمانن ،ئێمە هەموو لەناو سەبەتەی دوژمنەكاندا دەژین وخۆشمان بەدەست كۆمەڵێك مارەوە كە ناوی خۆیان ناوە سەركردە ئەوەندەی تر توشی داڕمان وكەوتن و نەگبەتی بوینەتەوە .

سەختە لەسەدەی ٢١نەتەوەیەك لەناویش ببرێت دونیا بێ دەنگ بێت لەسەری ،نەتەوەیەك هیچ رستەیەك نایگرێتەوە جگە لەوەی ئێمە قەرەجی دابەشبووین وسەركردەكانیشمان بازرگانی بە سنور ونەوت ومانا وئایندەمانەوە دەكەن.

ئەوەی رویدا لەسێدارەی ڕامینەوە دەستپێكە بۆ كەوتنی گەورە ،بۆ پوكانەوەی خەونی دوای راپەڕین و بۆ نەمانی دیفاكتۆیەك كەناوی هەرێمە.

پەلەمەكەن یارییەكە تازە دەستی پێكرد ،هێلكەكان تازە دەژمێردرێن كە زۆربەیان لەسەر سەری ئێمە دەشكێنرێت .ئێمەی سوتەمەنی بەرداشی روس وئەمەریكا وئێران ،ئەو شەڕەی ئایندەمان دەكاتە سوتماك ،كەچی سەركردەكانمان خەمسارد لە دونیا دەڕوانن وئەوان هەر پارە ونەوت لایان مەبەستە نەك ئایندە ومرۆڤەكان..

ژوان قادر

ھەواڵی زیاتر